Panton Aceh Versi Terbaru Haek Takem
- Cicem keudidi dipasi puteh.
- Didong sibareh cama dilaot.
- Ule yang susah meu tamah seudeh.
- Tinggai gaseh bunggong lam balot.
- Uloen disinoe gata disideh.
- Setia gaseh cinta meu bek roet.
- Tapreh uloen bunggong lam lapeh.
- Bek le tapileh cinta dilikot.
- Sicicem pala lagak han abeh.
- Sicicem puteh raja wali sambot.
- Hawa uloen eu bunggong lam lapeh.
- Mata loen peudeh rasa ka supoet.
- Didalam gle pade that luwah.
- Suson beurekah keu kaye maguen.
- Uloen meu rawe hate hana pah.
- Uloen meu kisah cinta yang diplueng
- Di teugoh malam mata loen mirah.
- Teugeut hana pah rindu loen peutheun.
- Rindu lam hate sabe gelisah.
- Han pat loen peugah uloen meu jageun
- Dibineh pasi timoh bak lipah.
- Dara seu meurah sideh dalam krueng.
- Hate loen sunyi ule sang beukah.
- Rindu loen kubah keu sidroe ureung.
- Loen kalon laot memang kop luwah.
- Ureung meuriah sinan jeut leubeung.
- Mata loen supoet dibalot susah.
- Tariwang bagah hai putroe buleun.
- Meugah cukop trang buleun limong blah.
- Loen pandang jeulah sira meu jageun.
- Loen harap gaseh riwang beu bagah.
- Bek loen ta kubah dalam musem khueng.
- Loen kalong bungkoh didalam cawan.
- Hana soe hidang keuneubah jameun.
- Hajat loen beu troh bagah tariwang.
- Ta ces petrang lampu bak reunyeun.
- Loen kalon tuloe teugoh terebang,
- ji tinggai kawan didalam umpong.
- Loen neuk eu jioh han troeh loen pandang.
- Pue keuh hai sayang na laen ureung.
- Cicem ka jiwoe oh wate supoet.
- Mata uroe lop ka lupah asa.
- Wate loen ingat masa yang dilikot.
- Meu bek le roet ie mata duka.
- Cicem keu didi dibineh laot.
- Ujeun oh supoet susah teurasa.
- Kasep keuh luka cinta dilikop.
- Bek le meu sambot oh troh bahgia.
- On sireen meugulong-gulong
- On keurusong meuputa-puta
- Meunyoe adek galak keu loen
- Tapreh bak jurong lon woe sikula
- Tajak u laot ta kawee bileh
- Tasok bak pureh tapandang mata
- Abang disinoe adek disideh
- Pajan keuh ta eh saboh bantai dua
